O Delegado Territorial da Xunta en Ourense, Rogelio Martínez, visitou hoxe en Baños de Molgas o Roadshow Movistar Galicia, a aula móbil que ten por obxectivo achegar as vantaxes e utilidades de internet á poboación rural e dar a coñecer os avances do Plan de Banda Larga do Goberno galego.

O presidente da Xunta, Alberto Núñez Feijóo, subliñou hoxe que no vindeiro curso escolar 2012-2013 un total de 60.000 estudantes galegos empregarán aulas dixitais, o que suporá achegar as novas tecnoloxías a un 40% máis de alumnos e alumnas que actualmente cursan os seus estudos nos centros públicos de Galicia. “Imos seguir traballando para facer máis competitiva a educación pública e imos seguir apostando pola incorporación das novas tecnoloxías no ensino financiado con fondos públicos en Galicia”, remarcou Feijóo.

A Xunta de Galicia colabora co Concello de Cangas na mellora da recepción do sinal de televisión dixital terrestre na localidade, tal e como se recolle no convenio asinado hoxe polo secretario xeral de Medios, Alfonso Cabaleiro, e o alcalde do municipio, Enrique Sotelo. Neste acordo inclúese a instalación do centro emisor de Piténs, que dá cobertura a Aldán e O Hío, e tamén a mellora dos equipos e da cobertura do centro emisor de A Magdalena, cun investimento total de 70.000 euros.

A Rede de Centros para a Modernización e Inclusión Tecnolóxica da Xunta de Galicia, CeMIT, pon a disposición dos usuarios das súas 98 aulas catro novos cursos de alfabetización dixital dentro do Plan de Formación 2012. Esta oferta formativa supón, por unha banda, un aumento das temáticas dispoñibles e, por outra, a mellora na calidade do ensino grazas  a adaptación pedagóxica e metodolóxica de cursos xa existentes no actual Plan de Formación.

A Xunta de Galicia dá un paso máis no cumprimento do principio de transparencia informativa coa posta en marcha do portal Abert@s, o espazo onde, desde hoxe, se publicará información de interese público da Administración galega e dos seus organismos en formatos abertos e estándar, para a súa reutilización por parte de cidadáns e empresas.

A Xunta recoñeceu no que vai de lexislatura 43.607 prestacións a dependentes, un 311,48% máis que o goberno anterior. O número de dependentes atendidos cuadriplicouse desde o inicio da lexislatura, e Galicia mantense como unha das poucas comunidades autónomas que segue concedendo altas e mantendo o volume de atendidos.

A directora xeral de Comercio, Nava Castro, participou esta tarde en Carballo na presentación para os comerciantes da zona do portal de comercio electrónico comerciogalicia.es. Trátase dunha plataforma posta en marcha en colaboración pola Consellería de Economía e Industria e a Federación Galega de Comercio que permitirá que os establecementos de proximidade galegos combinen a súa actividade tradicional coa venda a través de internet.

Esta semana abriuse o prazo para votar os vídeos presentados ao I Concurso de Curtas co móbil. As votacións poden realizarse  a través da páxina de Facebook  http://www.facebook.com/imitxunta, ata o 20 de maio.

Mediante o sistema “Gústame”, todas as persoas fans da páxina de “Imitxunta” poderán votar pola súa curtametraxe favorita unha soa vez, de maneira que non se perturbe o resultado da votación e resulten gañadores aquelas obras que sexan maioritariamente apoiadas.

O director da Escola Galega de Administración Pública, Pablo Figueroa, avanzou hoxe no Parlamento que a formación do persoal da Administración de Xustiza para 2012 presentará como novidade os itinerarios formativos. A través destes novos currículos os empregados públicos poderán especializarse nunha área concreta, que neste primeiro ano será a do dereito social.

O presidente da Xunta, Alberto Núñez Feijóo, anunciou hoxe unha “nova inxección económica” dirixida á innovación empresarial dotada con 12,5 millóns de euros, o que supón un incremento do orzamento do 15% a pesar da crise económica. Na rolda de prensa posterior ao Consello da Xunta que aprobou esta partida, o titular do Goberno autonómico detallou que se trata de axudas á investigación empresarial e a proxectos emprendedores e que están destinadas fundamentalmente ás pequenas e medianas empresas.